KISAH SI UTUH dan Si Palui | kdd kegiatan-gawel kkwnan
"MANANG TATANGGUHAN"
(turun atau naik)
Tasambatlah Si Utuh, umurnya kada pang tuha banar, anum kada jua. sadang lah, kakaya ulun jua tuh (tukang kesah.red). Si Utuh ni orangnya sadang kalakuan, pandir lantih bangat orangnya, kada mau kalah tupang lawan di orang. Muha kada pang bungas, kawa haja tuh di bawa ka orang banyak. Nang ma ulah kuitannya garigitan lawan si Utuh ni, iya pangoler banar bila di suruh bagawi, orangnya baroko bilang sambung puting tarus. Gaweannya badom di gardu bila malam-malam, bila bangun malandau, kikira orang makanan tangah hari hanyar bamumula bangun. Itu gen langsung ka padapuran haja jua bukah mancari makanan, paribahasa babasuh batampungas muha gin kada, he. Lalu abah lawan mamanya Utuh ni tapikir handak balakas haja mangawinakan si Utuh ni.
(sambil babisik abahnya Utuh bapander lwn mamanya Utuh)
Abah Utuh : Umamu, kaya pa ? cocoklah mun wayah ni kita pandiri Utuh ni?
Umanya Utuh : Nangapang te balalambat, di lalakasi ha abahmu ai!
(lalu sidin bagamat mamaraki Utuh nang kada tahu di basa makan sambil bajungkung)
Abah Utuh : Tuh, abah lawan mama ikam ada pang tapander sudah handak mambini akan ikam, nyaman nakai bila be isian bini tu, cangkal kita bagawe. Lihati kakawanan ikam nang sudah babinian, talain jua sudah. kaya pa nak? hakunai kalo ikam? urusan duit jujuran kada usah ikam pikirakan, abah kaina mananggung. Ikam bamodal "hi-ih" haja gen.
Utuh : (nang ngaran rahat nyanyamanannya makan, kasadakan si Utuh mandangar). How, kawin leh? ....DAHINDAK BAHAI !!!!! (lakas bukah Utuh ni kaluar pada rumah sambil mamuntal tapih ka pinggang imbah manyahuti abahnya).
balalu tumbar ai buhan kampung mandangar abahnya lawan mamanya Utuh kuciakan sambil bukah mangiyaw Utuh nang bukah arah ka padang tagah. Habut buhan kampung umpat macari si Utuh ni. Takuliling kasitu kamari sudah mancari, kada badapat jua lagi lawan si Utuh. Pas kikira handak sanja, buhan kampung tunggal ikungan bulik, manyarah mancari Utuh.
Lalu abahnya Utuh basuara, jer sidin,,, "ayo z mun buhan pian handak bulikan, kami satutumat lagi mancari nah". Babaya abahnya Utuh imbah basuara kaya itu lawan buhan kampung, tadangar suara mulai atas pohon.
"Oiii buhannya, jangan bulikan dahulu, aku di atas pohon pinang sini nah..!!" (Utuh bakuciak mulai atas, tangannya rahat bapingkut baragap di batang pohong pinang, pas ha di tatangahan batangnya).
Buhan Kampung : Bapala nya ai ikam Tuh leh......nangapang di ulah di atas pohon pinang tu bapingkut. turun kada !!.... malapahi buhan kami mancari i ikam tahulah !! (bemamai buhan kampung kada sakira lawan Utuh).
Utuh : ku hakunai turun, tapi kita betatangguhan dahulu nah, bila bujur tangguhan buhan ikam, aku hakunai turun !
Buhan Kampung : Bongolnya ikam tu Tuh, ba modil-modil haja...apa garang tatangguhannya dulu? (penasaran jua buhan kampung ni)
Utuh : Ni nah, tangguhi, aku ni bapingkut pas di tangah batang pohon pinang kalo, kikira aku ni TURUN kah......NAIK kah ....??
Buhan Kampung : jiaaahhh, nyata ai TURUN !
Utuh : yeee kadaa, q NAIK, he he he (sambil bakayakat naik si Utuh ni ka atas batang pinang sambil tatawa asa manang)
Buhan Kampung : BAPALAAAA,,, waluhinya kita !
Utuh : Tangguhi pulang, nah,,,, ku NAIK kah....TURUN kah pulang (sambil tatawa si Utuh)
Buhan Kampung : (sambil bapapanderan lawan bubuhan kakawanan), ei buhannya, tadi kita sambat TURUN, inya NAIK leh...ba arti kita sambat babalik haja pulang leh, kita sambat NAIK, nyaman inya TURUN. "nyata ai NAIK" jer buhan kampung
Utuh : salah pulang, aku TURUN, wkwkwkwk (sambil bapiruhut turun manuju tatangahan batang pinang pulang). "Tangguhi pulang nah, aku NAIK kah---- TURUN kah pulang ???????? (sambil galak tatawa marasa manang)
Buhan Kampung : (sambil bapikir)..mun kita sambat TURUN, inya NAIK.....tp bila kita sambat NAIK...inya turun. kaya ini haja sudah, kita sambat kaduanya buhannya ai)... "ikam TURUN-NAIK...NAIK-TURUUUNNN"..!
Utuh : Yoiii salah pulang, aku BAGANA haja....ha ..ha..ha (nyaring pulang tatawa Utuh)
Buhan Kampung : waluhinya wara damiya bubuhan kita,,(sangkal buhan kampung asa dipakalah Utuh)
Utuh : Tangguhi pulang nah, NAIK kah, TURUN kah, BAGANA kah aku ni (jer Utuh kaungahan)
Buhan Kampung : KURANG AJAR ikam tuhai, orang tuha di pakalah...(habis akal buhan kampung manangguhi si Utuh. Lalu ada nang basuara, "kita sambat samuaan haja sudah, TURUN-NAIK, NAIK-TURUN, BAGANA-BAGANA", sawat salah pulang , kita tinggalakan bulik haja sudah buhannya ai, malapahi ha, kada jadi asil jua...")
Buhan Kampung : (sambil kasasarikan) IKAM TUHAI "TURUN-NAIK, NAIK-TURUN, BAGANA-BAGANA"....
Utuh : (nang ngaran si Utuh, kada habis akal inya) YEEEEEE... SALAH PULANG BUHAN IKAM, aku balapas ...!! (sambil malapas ingkutan lawan ragapan ka batang pohon pinang, MANDABUUUUK si Utuh ni gugur ka tanah...TATIHARAP, kada sing garakan lagi. Abut kuciakan buhan kampung manyasah lawan si Utuh, sakali di balik buhan kampung awak si Utuh... ada tulisan "BIAR HA AKU MATI, ASAL MANANG HA TATANGGUHAN"
SEKIAN
Sumber : http://banjarmasin.tribunnews.com/
Si Palui: Salah Tapi Bujur
http://banjarmasin.tribunnews.com/ Sabtu, 7 Mei 2016 00:08
Bpost/Riza
SALAWAS katuju mangapungi urang bacaramah, kurinah pina ubah banar Palui wayah ini. Bilang katuju banar inya ka masigit, hususan wayah saban sambahyang lima waktu. Apalagi pas wayah kaum masigitnya garing, bilang ulit-ulit di masigit.
Subuh. subuh. Bangunan... bangunan. Sadang sudah. basubuh, Tuh! Basubuh, luh! palalau-palalau Palui bagarakan. Ya muslimun, akimu salah. Ya muslimun, akimu salah, ujarnya nangkaya bubuhan kaum bujuran. Tunggal ikungan jamaah datangan, tamasuk Ustat Sohib.
Rupanya basa Arab Palui bakalangan banar di talinga sidin, lalu Ustat Sohib managur sambil babisik, Lui, basa Arab ikam tadi tasiwah sadikit. Jangan disambat akimu salah, tapi aqimushsholah, ujar sidin mambujurakan.
Maaf Ustat ai, ulun kada singhaja. Maklum haja hanyar balajar, jawab Palui kasisipuan.
Ustat Sohib lihum haja lalu sidin manyuruh Palui ba-qamat.
Imbah tuntung sambahyangan asing-asingnya jamaah bulikan. Tatinggal Palui mambabarasihi wan manyinyimpuniakan nang pina bahamburan. Paharatan lagi asik basasapu di palatar masigit. Palui didatangi urang.
Assalamualaikum, ujarnya lihum sambil manyurung tangan lawan Palui.
Wa' alaikum salam, Ada apa yu? ujar Palui.
Tarimakasih banyak, kaum lah, ujar urang naitu manyalami Palui. Takarijut dahi Palui kada paham napa maksudnya. Tapi baluman sawat Palui batakun, urang naitu bapandir pulang.
Ngaran ulun si Muslimun, kaum ai. Ulun manyupir trak naitu ka Samarinda, ujarnya sambil manunjuk trak nang ada di pinggir jalan. Malam tadi ulun kamugukan di muka masigit ini. Tuhuk banar ulun mangucik-ngucik, tapi kada mau hidup jua. Lalu taguring ulun di dalam mutur, bamandak satumat Muslimun. Pas subuh tadi, ulun tabangun mandangar pian bagarakan. Ulun dangar pian manyambat; ya Muslimun, akimusalah, ya Muslimun, akimu salah. Lakas ulun bapuat, mamariksa aki muturnya. Sakalinya dasar banaran, kapala akinya tapacul. Imbah ulun pasang, lalu ulun hidupi. Harau tu, kaya mambuang kalimpanan. Muturnya langsung hidup, kaum ai, ujar Muslimun kahimungan.
Tarima kasih banar, kaumlah, jaka kada pian, ulun kada kawa tulak, ujarnya lagi sambil mangajalakan amplok ka kantung Palui.Palui maka am kagum kada sing suaraan. Ini ngarannya, salah tapi bujur, ujarnya dalam hati sambil manating amplok. Muslimun.
Muslimun.. Mudahan ai akimu kada salah lagi, ujarnya uling-uling kapala. (bp/abr/rep)
Si Palui: Katuju Nang Batuyuk
http://banjarmasin.tribunnews.com/ Rabu, 4 Mei 2016 00:12
Bpost/Riza
Ilustrasi Palui
MULAI matan halus Palui handak banar malihat Banjar tapi kadada nang mambawainya, handak tulak saurangan kada wani apalagi dipadahakan harus banyak basangu duit. Makanya sampai umur parak salikur tahun ini inya bausaha banar kaya apa haja supaya malihat Banjar karna mandangar kisah kakawalannya bahwa Banjar sudah maju banar.
Maklum hidup di kampung, maka Palui bausaha manabung dari gawiannya maambil upah manaik nyiur, batabas di pahumaan atawa mamulut burung.
"Lui jangan talalu cangkal banaik nyiur kaina kada tarasani kawin!" ujar Garbus kukuciak matan bawah.
"Sangkiatnya kuat haja jadi insya Allah kada cagar gugur," sahutPalui matan atas puhun.
"Maksudku kadanya gugur Lui ai, tapi kasihan ading halus tarancaki tagapit," sahut Garbus manggayai Palui.
"Aku bahimat bacari ini karna mandangar kisah ikam makanya aku handak jua malihat banjar," sahut Palui.
Rupanya niat Palui takabul jua wayah Palui dikiyau ulih mamarinanya supaya datang ka Banjar ungkus taksi wan sangunya ditanggung ulih sidin. Mamarinanya itu maminta tulung wan Palui manunggui rumahnya karna sidin saparanakan handak tulakan ka Jawa. Palui tulak ka Banjar kada saurangan tapi badua wan umanya.
Lui.. ikam harus bujur-bujur maharaguakan rumah pakacil ikam ini karna urangnya laki bini pa-apikan banar, jangan pina lugu kaya hidup di kampung batapih basalawar pina barubutan, ujar umanya.
"Mudahan kawa haja babarasih manuruti anjuran sampiyan," sahut Palui.
Hari pamulaan, hari kadua sampai hari katiga, mamanyaPalui sarik tarus karna tingkah laku Palui kada baubah-ubah, pambarang banar, pamurici kaya hidup di kampung.
"Kalu bahira bujur-bujur di kakus ada wadahnya," ujar umanya manuduhi.
"Inggih ulun paham haja," sahut Palui.
"Tapi kanapa babarapa hari ini kakus rigat banar kulihat ikam bahira kada diluang kakusnya," ujar umanya.
"Ulun rasa canggung karna bila bahira di luang kakus, tahinya langsung hilang kada katahuan tuyukannya. Kada kaya bahira dibawah rumbia. Lalu ulun hajan dihiganya haja supaya katahuan ganalnya tuyukan karna pasti sabanyak itu jua nasi nang dimakan," ujar Palui manjawab.
"Ikam dasar kampungan banar Lui ai kada kawa manyasuaiakan hidup nyaman nang saraba barasih," ujar umanya sarik. (bp/sug/rep)
Si Palui: Banyu Tatamba
http://banjarmasin.tribunnews.com/ Selasa, 3 Mei 2016 00:07
Bpost/Riza
Ilustrasi palui
SUDAH samingguan ini Tulamak manaradak dan mancangkul pahumaan karna sudah babanyuan. Makanya sudah samingguan ini jua inya pina kauyuhan banar, pina manggah.
“Ikam itu mustinya batakun lawan kawal kita si Palui. Supaya kawa bagawi siang malam kada saling uyuhan, kada panggaringan,” ujar garbus mambari saran.
“Napa dibawa dalam bungkusan itu Lui?” ujar Tulamak.“
Aku mambawa banyu tatamba,” sahut Palui singkat.
“Pantas haja kawal kita si Palui ini sigar tarus walaupun bagawian barat karna ada baisian banyu tatamba. Di mana ikam maminta Lui, wan guru siapa ikam bapasan,” ujar Tulamak bahimat batakun.
“Nah Mak, si Palui ada nginuman banyu tatamba supaya awak kada uyuh.
Baiknya ikam umpat jua maminta,” ujar Garbus manyuruh.
“Lui... uiii Lui, kawalah aku umpat maminta banyu tatamba itu?” ujar Tulamak manggamati.
“Ayu ja, ayu kita tulakan ka simpang tiga itu nah, di situ ada warung julak Tambi, sidin ada banyu tatamba,” ujar Paluimambawai Tulamak.
“Barapa kita mambari sidin Lui?” ujar Tulamak.
Imbah sampai di warung julak Tambi, Palui manunjuk butul-butul nang basusun di rak warung julak Tambi, lalu manyuruhTulamak mamilih.
“Mambarinya tagantung butulnya, apakah butul ganal atawa butul halus,” ujar Palui
“Ayu bayari haja, kada tasalah Mak ai, itulah banyu tatamba nang kuamalakan batahun-tahun,” ujar Palui sambil mambawai Tulamak bulikan imbah manukar dua butul ganal.
“Kada usah baujek Mak ai, sudah parak. Supaya kada uyuh baiknya kita nginum banyu tatamba ini. Banyu di butul ini bujur-bujur banyu tatamba,” ujar Palui.
“Tatamba napa Lui?” ujar Tulamak mulai curiga.
“Banyu di butul ini adalah banyu tatamba, yaitu tatamba... tatamba haus,” ujar Palui langsung manuntum butulnya.
“Wah, waahhhh... kukira tadi tatamba supaya kuat mancangkul siang dan manggasak umanya malam. Eee... sakalinya tatamba haus, tatamba rakungan karing,” ujar Tulamak kakalahan.(bp/tam/rep)
Komentar